張健峰 ：華倫追打落水狗伊巴

西甲 01:00 （日）61 華倫西亞 Vs 伊巴
華倫西亞今晚喺主場迎戰伊巴，「蝙蝠兵團」家陣要同西維爾爭來屆歐聯入場券，加上佢哋下仗就要硬撼皇家馬德里，今晚對伊巴呢3分點可以失吖？既然雙方實力有一段距離，承諾會捐錢賑災嘅華倫，應該會好心有好報大勝伊巴，1.58倍「讓主」趁熱食。（now632台及TVB13周一凌晨1:00直播）

好心有好報！華倫捐錢助災民
唔單止西甲冠軍鬥得激烈，「4哥」位都一樣爭得勁激，上輪失分畀華歷簡奴嘅華倫，要騎住西維爾嘅話不容再失。前鋒洛迪高摩連奴上仗領紅要停賽，佢個位會由傷愈復出嘅皮亞堤頂替，配合箭頭尼格度同菲侯利，強大火力足以摧毀伊巴防線。仲有呀，「蝙蝠兵團」尋晚宣布，會將今仗門票嘅2%收益捐出，幫助尼泊爾地震災民，張峰相信，好心一定有好報嘅！

對家伊巴踏入2015後表現走晒樣，單計下半季踢嗰15場聯賽，伊巴竟然錄得1勝1和13負，期間只係攻入過5球咁大把，最弊係佢哋今仗仲有中堅洛迪古斯拿華斯受傷缺陣，今鋪去到米斯泰拿球場，唔慌有運行啦！