張健峰 ：西維爾地頭龍 唔赦皇馬

今晚西甲有場重頭戲，由西維爾主場惡鬥皇家馬德里。皇馬喺聯賽落後巴塞2分排第2，爭冠嘅佢哋嚟緊每一分都唔失得，壓力極大，何況佢哋亦有歐聯後顧之憂，今場惡戰隱憂重重。西維爾同樣要搶分爭頭4拎歐聯入場券，戰意唔差過皇馬，況且呢班波主場專打大老虎，對巴塞、馬體會未輸過，1.82倍「讓主」抵博。

（now632台周日凌晨2:00直播）

打和巴塞 馬體會 今季主場未輸過
西維爾要兼顧聯賽同歐霸兩條戰線，歐霸雖打入4強，不過聯賽仲要搶分同華倫爭頭4，為來季歐聯入場券而努力。睇番賽績，西維爾近15場聯賽加盃賽保持不敗之餘，周中造訪伊巴更特登留力，仍然以3:1擊敗對手，近況弗到爆，絕對值得投信心一票。

西維爾陣中都有唔少球星，中場班尼加傳送功夫一流，配合前鋒卡路士巴卡同加美路，唔難喺皇馬身上取得入球。仲有呀，呢班波喺地頭往往打高幾皮，對住巴塞隆拿同馬德里體育會都保持不敗，踢落更加係佔上風嗰隊，仲創造出今季主場未輸過嘅佳績，睇怕皇馬未必輕易搶到分咯。

「黑面」C朗 腳風麻麻
另邊廂嘅皇馬就傷兵滿營，前鋒賓施馬唔踢得，中場大將莫迪歷掛免戰牌，就算賽前復操嘅加里夫巴利趕及復出，狀態都唔慌好。再講吖，C朗喺周中大炒艾美利亞一戰繼續冇波入，腳風似乎唔多順，而且仲畀攝影師影到佢不滿艾比路亞搶「士哥」，勁黑面。咁自我中心，隨時影響到成班波嘅士氣，今仗失分唔出奇喎。