黃興桂：冠軍是如何煉成的？(上)

歐洲各大聯賽已經轉彎入直路，Peter睇波都睇咗60年，又有教波、踢波同擔任評述員，想藉住今明兩日專欄中，分析下要奪得聯賽錦標嘅7大元素。第1係球會要有健全架構，包括經濟上、好班主、有料教頭及出色球員；第2係防守，放喺成季流流長嘅長途賽中，穩健防守往往比進攻更重要，Peter永遠覺得substance over style，即係實用重要過花式，因為你每仗唔畀對方率先攻破大門，點都有機會叫胡，起碼坐和望贏。

第3係每季聯賽要開個靚頭，好似今季車路士頭3個月都未嘗一敗，正所謂人追你好過你追人，始終領先之下可以睇定嚟食，作出適當輪換唔使用到班手下殘晒，相反如果你係落後太多嘅追趕者，場場都要踢到背城借一，贏得一仗都贏唔到十場啦；仲有4個元素明天待續。

兩史大戰和波正路
講番今晚英超，李斯特城憑住無比鬥心及地利，可擊退每況愈下嘅紐卡素，至於殺入足總盃決賽嘅阿士東維拉，主場對四平八穩嘅愛華頓「和」味濃，而史雲斯主場對史篤城，雙方都高不成、低不就，打個和波好正路。

金句：要奪聯賽錦標，七大元素唔少得