Mic少 ：阿聯嚇窒「替工」獅吼

搬場增氣勢迎季後賽
澳職季後賽展開，頭炮阿德萊德聯主場對布里斯班獅吼，由甘巴爾領軍嘅阿德萊德聯一早穩奪季後賽席位，球隊以逸待勞有較多時間備戰已佔咗先機，今仗安排喺可容納5萬3千多人嘅橢圓球場舉行，主隊聲勢更旺盛。獅吼靠珀斯光輝被取消資格先至可以打入季後賽，根本未夠班，加上有亞冠盃後顧，可謂腹背受敵，簡單撐主勝。

（有線64及203台周五下午5時30分直播）

雖然阿德萊德聯早前輸過畀獅吼，但要留意當時球隊基本上已獲得季後賽席位，唔需要同對方硬撼，賽果未能反映雙方實力。事實上「阿聯」喺前傑志教練甘巴爾執教下，攻守兼備，尤其係進攻多元化，前線柏保路山齊士、沙治奧施里奧及卡路斯卡一直保持穩定入球率，加上馬比、奇治葛雲後上攻門亦不時有斬獲，進攻點眾多，令對手防不勝防。

「阿聯」上仗大炒墨爾本城4比1，正好為今場壯行色，會方今仗亦棄用只能容納1萬7千人嘅軒特馬殊球場，移師可容納5萬3千多人嘅橢圓球場比賽，令更多fans可以入場打氣，聲勢肯定更浩大，未開波已先嚇窒對手。

獅吼兼顧亞冠進退失據
布里斯班獅吼喺常規賽只排第7位，本來冇份踢季後賽，但因為第3位嘅珀斯光輝違反薪酬條例被取消資格，令獅吼冷手執個熱煎堆，但呢位「替工」論實力只係陪跑分子。再者獅吼將於下周中踢亞冠盃生死戰對浦和紅鑽，面對連續兩場惡鬥，依家進退失據。加上近期兼顧亞冠盃經常要一周雙賽，體力亦輸蝕，頂唔住「阿聯」強攻。

季後賽賽制
常規賽積分榜頭6名球隊進行季後賽，全部以一場過分勝負，法定時間內打和將加時30分鐘，再和則以互射12碼決勝。

淘汰圈：常規賽第3對第6名及第4對第5名，排名高的可獲主場之利。兩隊勝出球隊進身4強。

4強：常規賽第1名對淘汰圈兩支勝方排名較低一隊，常規賽第2名對淘汰圈兩支勝方排名較高一隊，常規賽第1名及第2名獲主場之利。兩隊勝出球隊進身總決賽，常規賽排名較高一隊可獲主場之利。