科娜 ：般尼茅夫-1保直升夢

主場謝幕騷 上足彈藥砌
英冠剩番最後兩輪賽事，排第2位嘅般尼茅夫今晚主場收咧戰迎擊等放假嘅保頓，般尼茅夫上場對錫周三大意失分，搞到將榜首讓畀屈福特，今場不容再失否則連第2位都不保，失去直接升上英超嘅資格，一於捧讓球主勝！

（TVB 301周二凌晨2時45分直播）

只差兩場般尼茅夫就有望創會125年來首次升上國內最頂級聯賽，兼且今場係主場謝幕戰，般尼茅夫唔單止要球迷大力支持，呢支以紅黑為主色嘅球隊更呼籲球迷比賽當日將球場變為一片紅黑海，務求嚇窒對手！

般尼茅夫攻力屬英冠最勁，3大前鋒比列比文、哥林威爾遜同卡莫根特聯賽入球數字都達雙位數，連中場馬特列治都入到12球，仲有獲球迷選為今季最佳球員嘅哈利艾達，呢位25歲愛爾蘭籍中場今季大熟大勇，入咗8球同交出3個助攻。哈利艾達爭勝心極強，帶動埋其他隊友爭取佳績。有呢班進攻好手在陣，今場真係唔使擔心般尼茅夫入唔到波，佢哋上場對錫周三失分只因後防犯錯，今場只要吸取教訓做好防守，贏兩粒或以上冇難度。

保頓等放假無心攔路
保頓唔需要為護級而戰，球員可以話等放假，而且球隊傷兵名單水蛇春咁長，前鋒麥斯基頓、克勞夫、格力戴維斯、中場戴倫柏利及後衞麥諾頓全做十字軍，今場即使想贏都有心無力，捧讓球主勝先係明智之舉。