Combo King ：咸美頓頹足三個月必反

每逢周五都係二線波做主打，阿King依然搵到好嘢，就係蘇超獨腳戲咸美頓主場迎戰馬瑟韋爾。正所謂換帥如換刀，咸美頓自前任領隊阿歷士尼爾季中離隊，已經三個多月未贏過波，曳到冇朋友，馬瑟韋爾仲唔趁機大打落水狗咩？馬軍有得受讓梗係捧讓球客勝。

（TVB 301周六凌晨2時45分直播）

首先提一提大家由今輪開始，蘇超頭六名會列入爭標組角逐，尾六隊則落入護級組廝殺，每組會打單循環，今晚咸美頓對馬瑟韋爾屬護級組賽事。查實今季升上蘇超嘅咸美頓，季初表現不俗，主帥阿歷士尼爾應記一功，但呢位有料教頭一月轉教英冠球隊諾域治後，咸美頓搵咗陣中老將簡寧兼任領隊，立即一沉不起，已經三個多月、連續十三場聯賽未嘗一勝，當中輸咗九仗，眾將愈踢愈冇信心。相反，尾二嘅馬瑟韋爾從谷底反彈，之前四場聯賽贏咗三仗，佢哋依家同尾三嘅羅斯郡相差六分，如果想避免踢護級附加賽的話，今仗對堅頹嘅咸美頓係時候發力搶分，仲有得受讓咪錯過。

古賓守勢波吼半場和
至於俄超烏法主場對古賓，後者上輪力戰悶和榜首辛尼特，表現唔錯，呢班波非常重視防守，之前七場有六仗開出半場和，絕非偶然，況且烏法近八仗僅一勝，初段好難攻破古賓城池，半場和一於追多鋪。最後瑞典超科根堡主場對衞冕嘅馬模，科根堡前鋒基辛洛域因傷上陣成疑，馬模則有後衞艾歷祖漢臣刑滿復出，有力反客為主，客勝值得捧場。