黃興桂：馬體會上得山多終遇虎！

平均率，英文係law of average，中國人亦有句說話，就係上得山多終遇虎。皇馬今季多次與硬淨兼有好教頭施蒙尼帶領嘅馬體會狹路相逢，大部分都觸礁，但經過上周歐聯8強首回合作客同市死敵互交白券，今晚返巴拿貝球場打次回合，以「銀河艦隊」咁高嘅質素，主帥「肥安」安察洛堤亦具備豐富嘅歐聯經驗，加上吸取之前幾次教訓，令呢隻「大老虎」爭勝飢渴感更加強烈，以平均率嚟講，Peter唔相信佢哋一而再、再而三咁畀馬體會剋住，所以今次同城打吡戰，皇馬可憑主場之利贏番場進身4強。

祖記擅守 坐和望贏
另一場次回合摩納哥主場火併祖雲達斯，好多人認為「斑馬兵團」首回合靠一個12碼贏波勁夠運，查實摩納哥打得唔錯，今晚返主場有機會反敗為勝。不過，Peter對此不敢苟同，始終祖雲達斯有一球在手，今仗必定穩陣行先，呢支意甲一哥防守固若金湯，執行戰術指令嘅能力極強，摩納哥就算有地利亦好難咬得入佢哋，預計祖記可坐和望贏。

金句：歐聯同城打吡戰，我信平均率同主場之利