樂比堅尼：史浩克主場屠狼

靈魂回歸鞏固歐霸席位

（日）44 禾夫斯堡 Vs 史浩克04 德甲 23:30
尋日反完兩支歐聯球隊，今日再向另一支出戰歐洲賽球隊禾夫斯堡埋手。「狼堡」日前喺歐霸畀拿玻里痛宰1:4，球員無論身心都嚴重受挫，今晚主場鬥有主將達斯拿復出嘅史浩克04，狼堡讓半一，樂比捧下盤。

（有線61、64、201、203及中央5台周日晚11:30直播）

樂比一向認為歐霸後遺症比歐聯後遺症影響更大，一來歐霸周四至踢，球員恢復時間更短，二來歐霸球隊普遍兵源同資源緊絀，兩條戰線好容易兩頭唔到岸。狼堡一直以嚟其實處理得好好，喺輸畀拿玻里之前取得6勝1和佳績，但衝完一輪之後，球員明顯有疲態，上場對拿玻里開始畀人力不從心感覺。

禾夫斯堡爭盃或留力
當然，狼堡歐霸8強首回合落後3球，喺嚟緊周中次回合要平反敗局一啲都唔易，但既然聯賽落後榜首拜仁成10分，亞軍席位亦算穩陣，有得揀仍會以盃賽行先，換句話講今場聯賽係有失分空間。

史浩克自從歐聯贏完皇馬4:3之後沉咗一輸，近4場聯賽僅得3和1負，近3場仲要冇入過波！史浩克狀態回落，某程度上同靈魂人物達斯拿受傷有關，不過佢上仗對弗賴堡已後備上陣小試牛刀，經過一個星期調整，相信今仗可正選亮相，對史浩克鋒力大有幫助。

史浩克主席講明泵水
何況史浩克主席東尼斯亦都講明，雖然取得來屆歐聯入場券機會較渺茫，但來季仍會增加投資衝擊各項錦標，故球隊必須喺餘下賽事爭取高排名同鞏固歐霸席位，戰意唔使懷疑，對賽往績方面史浩克亦有優勢，近6次交手有5次贏波，今場受讓有着數。

樂比推介
史浩克04（下盤）