卡斯拿斯最佳生日禮物 摩連奴落馬上車

卡斯拿斯最佳生日禮物 摩連奴落馬上車

和平分手！皇家馬德里前日宣布，摩連奴帶埋今季最後兩場西甲就會離隊，各個範疇都拍爛手掌，重見光明嘅卡斯拿斯偷笑、巴塞狂歡、車路士同英媒暗喜，連安察洛堤同埋賓尼迪斯都各懷鬼胎，摩連奴執包袱令到成個歐洲球壇出現骨牌效應。

西班牙時間5月20號夜晚8點，皇馬主席佩雷斯召開記招，公佈摩連奴教埋餘下兩場西甲就會卸任，並強調今次唔係炒魷魚，而係雙方協議下和平分手。明晒啦！皇馬咁嘅人腳同班費，竟然四大皆空度過2012至2013年度賽季，西班牙盃決賽仲喺自家門前失威，簡直係世紀大災難，不過喺5月20號生日嘅卡斯拿斯一定會幸災樂禍，因為佢下半季俾摩連奴打壓到抬唔起頭，而家一天光晒，呢份生日禮物超讚！

安察洛堤熱門接掌人
雖然話和平分手，但走得咁樣衰，摩連奴都真係抵死，西班牙盃沉唔住氣被趕出場，唔止令旗下球員都失控，亦直接影響咗加時嘅部署，狂人對失盃責無旁貸，加上佢3年嘅銀河艦隊執教生涯當中，其實只係幫皇馬拎過3個冠軍，相反死敵巴塞就袋咗8隻獎盃，連馬體會同期都有4冠在手，摩連奴呢鋪真係徹底失敗。
咁當然啦！凡事都要向多方面睇嘅，卡斯拿斯同巴塞全體成員開香檳嘅同時，其實車路士同英國傳媒都一樣開心到見牙唔見眼，首先阿巴莫域治可以免費搵摩連奴嚟重掌車匙，甚至有消息話雙方根本就已經簽咗約，下季狂人重返史丹福橋將會提攜埋林柏特做教練團成員，講到言之鑿鑿咁，而英媒喺摩連奴回歸英超下，更加唔擔心冇新聞，咁你話係咪全英歡騰喇！

賓尼迪斯或教拿玻里
車仔下任主帥有着落，咁皇馬又點呢？安察洛堤、米高勞特立同埋賓尼迪斯都係頂頭熱門，肥安照道理最適合，問題係聖日耳門決心留人，而皇馬球迷就最想賓尼迪斯執教，可能因為佢喺西甲戰績顯赫，但有消息指肥賓會去意甲教拿玻里，所以銀河艦隊新帥一職仍然像霧又像花。