卡爾萬：艾美利亞易帥立立亂 巴塞-3照捧「讓主」

艾美利亞近況曳到震，上輪主場慘敗利雲特腳下，球會終於出手炒教頭桑馬天尼斯，今場西甲快車造訪魯營鬥巴塞隆拿前，搵嚟前巴塞球星沙治接掌帥印。不過陣前易帥向來係兵家大忌，沙治初嚟埗到亦難有作為，受讓3球都制唔過，捧巴塞1.95倍「讓主」啱數！

（now632台周四凌晨2:00直播）

沙治接掌即倒戈魯營
艾美利亞連埋上場鬥利雲特大敗，連續7場聯賽未贏過，最弊係成班箭頭啞晒火，除咗希密特射入球12碼，同埋對手烏龍送禮外，近6場都冇入過波，可謂毫無還擊之力，隔得幾日又點會突然反彈？

當然啦，艾美利亞新帥沙治首度領軍就重返魯營倒戈舊主，唔使講梗係想做齣好戲，可惜佢帶隊經驗唔多，淨係做過巴塞青年軍同乙組仔維爾瓦嘅教頭，接手咁短時間根本未摸清班波。如果沙治搞唔切註冊手續嘅話，艾美利亞今場更會處於「無帥狀態」，咁搞法真係受讓幾多球都捧唔落手。

巴塞之前西甲主場倒灶不敵馬拉加後，成班球星知恥近乎勇，打出一段8連勝強勢，曼城同皇馬都唔係佢哋手腳，近況真係弗到震。再講吖，美斯、蘇亞雷斯同尼馬組成嘅「MSN」鋒線，近3場得「哨牙蘇」斬獲1球，今場喺魯營遇着「魚腩」艾美利亞，相信「MSN」為咗重新撻着副偈，必定搏盡狂數，一於捧「讓主」。