笛子波童 ：PSG兵疲 炒唔起聖伊天

法國足總盃4強巴黎聖日耳門（PSG）主場鬥聖伊天，PSG踢完國家打吡後元氣大傷，嚟緊周末佢哋要同巴斯蒂亞爭奪法聯盃，下周又有歐聯8強首回合大戰巴塞隆拿，就算近年對住聖伊天贏多輸少，今場要大勝都有一定難度，建議捧細盤。

（TVB 302周四凌晨3時直播）

留力法聯盃決賽
PSG連盃賽在內近8次對聖伊天未輸過，其中最近4次全部贏晒兼冇失波，頗有格食格味道，現時主W只有1.36倍熱得有道理。但要留意PSG喺上場國家打吡擊敗馬賽付出代價唔輕，中堅大衞雷斯同中場莫達齊齊傷出，除咗今仗無法上陣，甚至有可能錯過下周中對巴塞嘅歐聯8強首回合，嚟緊周末佢哋仲要同巴斯蒂亞角逐本季首項錦標法國聯賽盃，為避傷兵情況惡化，教練及球員難免有顧慮。

聖伊天最近兩次鬥PSG都係僅輸0比1，戰況未算太過一面倒，而且佢哋連盃賽在內已保持7場不敗，面對馬賽、摩納哥或里爾等實力分子都唔使輸，今次乘對手兵疲有望拉近彼此距離，預計今仗入波只會係一球起、兩球止，捧細比主W更好路。