法達斯維：維拉QPR大晒冷

護級6分波 入波一定多
今晚英超爆發下游大戰，由阿士東維拉主場硬撼昆士柏流浪(QPR)，由於護級形勢緊湊，兩軍為逃離降班漩渦焗住擺大個頭，喺呢場護級六分波豁出去進攻，QPR箭頭查理柯士甸更重拾射門鞋，呢場入波一定多，斯維力撐大盤。

(now 621周三凌晨2時45分直播)

季尾波一向戰意行先，今仗兩軍都有共同目標－－護級。維拉自2月由舒活接手執教後，除咗大大提升球員精神面貌外，亦一改前任林柭極度消極嘅防守戰術，鼓勵球員主動壓前進攻，令前線嘅賓迪基同艾邦拉荷即時生晒，兩人近三仗合共入咗五粒，同林拔時期死氣沉沉相比，可謂天淵之別。雖然咁做有啲冒險，但維拉依家護級情況唔多樂觀，為爭勝搶分就不得不搶攻。

客軍查理柯士甸破入球荒
QPR排名比維拉仲低，更加冇得諗要焗攻，雖然之前試過連輸五場，明顯技不如人，但勝在場場有波入兼全開大，證明佢哋仍為護級力拚至最後一刻，上仗出人意料地作客大勝西布朗四個一皮，三支大炮伊度亞度華加斯、森莫亞、查理柯士甸齊齊有士哥，後者亦打破三場入球荒，信心返晒嚟，由於伊度亞度華加斯因傷上陣成疑，QPR靠晒查理柯士甸數胡。既然形勢迫使大家要擺大個頭，今仗隨時做大騷，斯維寧捧入球大。