Mic少 ：皇馬細嗒格蘭納達

早場未瞓醒 C朗腳風唔順
皇馬未瞓醒，炒唔起CF格蘭納達！皇家馬德里馬今周主場對CF格蘭納達，西甲豪門一向反對踢超早場，皆因有違球員平時生活習慣，皇馬班球星狀態已經麻麻，經過國際賽折騰後，依家仲要晨早比賽，肯定雪上加霜。CF格蘭納達屬於「爛仔格」球隊，踢法硬淨，勢必擺鐵桶陣死守，博攞1分。「銀河艦隊」兩大巨星C朗腳風唔順，加里夫巴利有傷，要咬入對手並唔容易。皇馬「-2」讓球風險太高，大細中位數3.5球，寧博2.25倍入球細。

（now 632周日晚6時直播）

西甲賽會近年為遷就亞洲市場，特別安排喺當地時間中午設「超早場」，但對於踢慣夜波嘅西甲球隊，卻係一種折磨，事關當地人慣性遲起身，喜歡歎慢板。皇馬唔好彩，今輪要「晨運」，隨時影響發揮。最大鑊係「銀河艦隊」正值低潮，包括盃賽，近5仗只得1勝1和3負，上輪仲喺國家打吡輸畀巴塞，認真打擊士氣。

巴利負傷 BBC瀕崩潰
皇馬走下坡，好大程度上因為C朗腳風唔順，令鋒線攻力大減，呢位金球獎得主喺早前歐國盃外圍賽又食白果，演出令人失望。另一位巨星加里夫巴利難得重拾射手鞋，卻喺為威爾斯對以色列嘅歐國盃外圍賽受傷，今仗上陣成疑，「BBC」鋒線處於崩潰邊緣。屋漏偏逢連夜雨，今季大勇嘅中場艾斯高停賽，進一步削弱火力。對教練安察洛堤而言，依家最緊要攞到3分，唔好畀巴塞拋離已經足夠，唔會在乎是否大勝。

陷入降班漩渦嘅CF格蘭納達整體實力當然唔可以同皇馬相提並論，強弱懸殊令佢哋更專注死守，早前作客馬體會，靠一股拚勁同對手周旋，只係小負0比2。由於射手祖安哥度巴受傷缺陣，睇怕CF格蘭納達威脅唔到皇馬大門。既然CF格蘭納達冇力反抗，而「銀河艦隊」缺態，相信總入球達4球或以上嘅機會唔高。