笛子波童 ：熱刺 般尼大騷停不了

今晚英超兩場賽事，頭場由力爭前四嘅熱刺作客鬥護級分子般尼，兩軍近年交手例必多波入，首選大盤。

（now 621周日晚8時30分直播）

尾場上演東北打吡新特蘭主場鬥紐卡素，紐卡素近年於打吡戰輸多贏少，幫新特蘭救亡嘅艾禾卡特首次於主場領軍出戰，平手盤捧新特蘭。

（now 621周日晚11時直播）

熱刺前鋒哈利卡尼繼上輪聯賽對李斯特城演出帽子戲法，剛為英格蘭於兩輪國際賽上陣亦取得一個士哥，腳風順到不得了，由年初主場擊敗車路士起計，球隊對上11場聯賽一共攻入26球，除咗作客擊敗西布朗3比0一役，其餘10場全部有失波，踢法有前無後，如以中位數2.5球計，亦已連續11場聯賽開大盤。

般尼對上一次於英超角逐係09/10球季，當年兩次交手一共炮製了11個入球。來到今季，雙方連盃賽碰頭3次，同樣交出了11個士哥，呢個對碰似乎已經係入球保證。一隊現時需要搶分護級，一隊則要力爭前四踢下屆歐聯，和波對大家都冇好處，隨時再度上演入球騷，續追大盤啱數。

東北打吡撐新特蘭
至於尾場東北打吡，新特蘭嘅荷蘭主帥艾禾卡特上輪處子領軍不敵韋斯咸，今次係佢上任後首度主場出戰，當然希望喺主場球迷面前贏波兼立威。早前因「衰十一」被內部停賽嘅阿當莊臣已可復出，呢名前英格蘭國腳於最近4次東北打吡個人入咗3球，協助球隊取得4連勝，新特蘭為護級一分都不能少，平手盤值得支持。