法達斯維：曼聯擺最強陣打謝維拉

同晚另一支力爭前4歐聯入場券嘅曼聯，坐鎮奧脫福主場迎戰下游分子阿士東維拉。紅魔連場報捷信心返晒嚟，最重要係主帥尹戈爾逐漸摸索到最強陣容，一度淪為廢柴嘅桑馬達、費蘭尼、艾舒利楊格被重新激活，難得喺魔鬼賽程中間攝隊弱雞維拉，梗係食住個勢炒多鋪喇，讓球主勝值得捧場。

（now 621周六晚10時直播）

之前曼聯領隊尹戈爾係咁用斬高波嘅戰術去衝去撞嘅進攻戰術，就算贏波都畀球迷取笑佢為「燒味師傅」。不過呢位「戰術大師」並唔係浪得虛名，喺重要賽事即刻見真章。踏入3月中展開嘅魔鬼賽期，曼聯連贏熱刺同利物浦，仲要贏得極具說服力，尹帥將朗尼推前打箭頭，後面由桑馬達、艾舒利楊格同費蘭尼協同策動進攻及後上入楔，成班波即刻生晒，後三者由廢柴同盟變身大功臣，表現Sharp醒，尹帥盡顯大師級功架。

魔鬼賽期最易食呢場
維拉雖在新帥舒活接手後略有起色，但過往對親曼聯都冇運行，近6對碰輸足5場，真係未踢已經腳仔軟，何況紅魔嚟緊要連對曼城同車路士，絕對有失分危機，為保前4席位，今仗對住最易食嘅維拉更加不容有失。

正所謂寧買當頭起，既然曼聯勢頭咁勁無謂拗頸，斯維力撐佢哋讓球主勝。