走肖：水手等收咧撐獅吼上盤

澳職今日有直播，布里斯班獅吼喺主場迎戰中岸水手，前者最近雖然好似未瞓醒咁款，但今場有4個球員踢完國際賽歸隊可以候命，隨時嚇你一跳，對家水手等收咧心態靠唔住，主隊讓半一，2.15倍上盤博得過。

（有線64及203周四下午5:00直播）

獅吼喺亞冠盃分組賽有1勝1和1負，下周要作客水原藍翼搶分爭出線，今場係咪會留力放軟手腳呢？未必喎，因為獅吼喺聯賽落後墨爾本城8分，但打少1場，數字上仲有機會爭季後賽席位，加上中場麥特麥基、後衞迪維利、占士當拿治同哥利布朗踢完太公波歸隊，主場發威唔奇。

另一方面，水手喺亞冠盃外圍賽出局後，表現都冇咩起色，近7場聯賽得1勝2和4負，前鋒麥西蒙同中場李察華尼斯養傷對佢哋影響都幾大，就算守將史唐路斯被新西蘭國家隊徵召後歸隊，都唔值得睇太高，畢竟佢哋出席季後賽嘅機會已幾乎等於零，等收咧心態唔似會阻人發達囉！