卡爾萬 ：哈索賓基上身 伯頓爭標搶芬

伯頓喺舊年底由哈索賓基接手後，班波表現如魚得水，由英乙前列分子變成爭標領頭羊，暫時高踞榜首位置，幾名箭頭亦猶如盡得主帥「黑色轟炸機」嘅真傳，近期着晒火頻頻入波，今場迎戰走勢麻麻嘅史提芬納治，開出1.73倍主勝話咁易！

（TVB301周二凌晨2:45直播）

史提芬納治近6場作客僅1勝
伯頓上月底突然走樣連輸兩場，但佢哋一到今個月即刻重新振作，踢4場贏4場不特止，埋單仲勁轟10球。其中麥高利、艾卡耶迪同馬菲彭馬幾名鋒將，好似得到「黑色轟炸機」哈索賓基傳授畢生絕學咁款，突然踢得勁Sharp醒，近3場聯手貢獻6球。再講吖，哈索賓基領軍主場出戰特別醒神，上任後11戰贏9場，家陣領先第2、3位嘅梳士貝利、韋甘比2分，往績靚、鋒將醒，唔係唔捧場吓嘛？

史提芬納治暫列英乙第9名，正為升班附加賽資格打拚，講到爭勝鬥心肯定夠，可惜佢哋近況認真麻麻，近兩場作客排名低過自己嘅劍橋聯同埃克塞特贏唔到之餘，上輪主場鬥實力一般嘅杜根咸直頭輸埋。最醜怪嘅係，史提芬納治近6場作客淨係贏過榜尾嘅哈特普爾，今場造訪「一哥」伯頓，真係想唔輸都幾難！