Combo King ：沙廠慌失失點讓阿度斯維

今日阿King將重心放喺3場阿甲，其中沙蘭迪兵工廠主場迎戰阿度斯維值得留意，前者今季開咧後未贏過，明顯有信心危機，尤其係後防踢到慌失失，點讓得起排名仲高啲嘅阿度斯維呢？阿King寧捧阿度斯維讓球客勝。

（周二清晨5時開賽、馬會網上文字直播）

以往沙蘭迪兵工廠都係阿甲前列分子，但喺開季前將尼高拉斯阿古利賣畀拉魯斯，上季頻有士哥嘅艾利文亦離隊，令球隊頓失進攻靈魂，「金毛虎」主帥巴拉莫真係巧婦難為無米之炊，特別係前仗對河床一度領先3比1，可惜後防唔夠集中連番犯錯，導致嘔番兩分出嚟，上仗更慘吞獨立隊4蛋，難怪開咧後6場不勝喺榜下游掙扎。

依家排第21嘅阿度斯維雖然係新升班分子，但經過頭兩仗輸波「交學費」後，逐漸適應阿甲節奏，跟住4仗錄得1勝3和，佢哋有自知之明唔主動爭取控球權，靠突擊殺對手一個措手不及，預計今仗會沿用呢種踢法，撞正沙蘭迪兵工廠防線漏洞多多，阿軍可睇定嚟食，有得受讓值得捧場。

堤格雷氣勢打爆防衞者
至於小阿根廷人主場對新芝加哥，後者升班後未贏過排緊包尾，明顯唔夠班，小阿根廷人小讓平半兼低水咪錯過。最後堤格雷主場對防衞者，防衞者有主力泰利捷亞上陣成疑，堤格雷挾住主場3連勝嘅氣勢，上盤捧得過。