阿占：比利時青訓好 殺出新血路

歐國盃外圍賽今晚繼續，當中B組形勢更係一片大混亂格局。6隊之中，除咗0分嘅安道爾之外，其餘5隊都有資格爭出線，今晚比利時會喺主場迎戰塞浦路斯，更係非勝不可，讓兩球照要1.95倍「讓主」。（有線62及202周日凌晨3:45直播）

勢估唔到，依家世界排名第4嘅比利時，小組排名竟然又係第4！更重要係落後以色列、威爾斯同今場對手塞浦路斯。不過，「紅魔鬼」貴為歐洲最強新勢力，已經進入青訓收成期，一班主將都係歐洲大球會主力，好似車路士中場夏薩特、雲達不來梅中場奇雲迪布尼、曼聯中場費蘭尼、曼城後衞高柏尼……個個都係所屬聯賽最頂尖球星，陣容星光熠熠點都要騷下「哥利」。

比利時今仗雖有前鋒盧卡古受傷退隊，不過賓迪基、梅頓斯等等喺國家隊屢建奇功，仲有新世代最佳門神泰拔高圖爾斯把守最後一關，呢個「黃金戰陣」，足以同世上任何一支球隊抗衡，塞浦路斯嘅級數根本頂唔住，主隊今場要炒3球完全冇難度。

塞浦路斯遇強即屈
另邊廂嘅塞浦路斯，一向畀人感覺係魚腩部隊，不過目前喺小組竟然有2勝2負，戰績大躍進！但睇真啲，佢哋除咗喺首場歐國盃外圍賽歷史性贏咗波斯尼亞外，之後對住以色列同威爾斯呢啲二線尾、三線頭嘅球隊都要輸波，另一場贏波就係對住超級弱旅安道爾。睇番塞浦路斯嘅走勢，如果你仲期望佢哋可以喺一線球隊身上攞到好成績，睇怕都係注定失望而回都得嘞！

頂占筍盤：比利時 （讓球主勝）