黃興桂：兵工廠為創造奇迹打拚

歐聯16強次回合將會喺今晚同聽晚上演，呢4場波嘅首回合全部都分到勝負，而當中形勢最險峻嘅應該係阿仙奴。因為兵工廠呢支英超「死剩種」首回合主場喺佔到唔少優勢下，竟然以1比3輸畀摩納哥，呢次去到蒙地卡羅踢次回合，Peter相信雲格會以「拚死無大害」嘅心態大踢進攻足球，盡量喺開波初段即入番一兩粒，咁就仲有機創造奇迹成功翻盤。

阿仙奴呢場波抱住背城借一嘅方式去作戰，心態上非常正面，而事實上佢哋亦有咁嘅前鋒人才，所以撇開佢哋最終出唔出到線唔講，Peter對阿仙奴呢場客W都幾有信心。

睇好馬體會巴塞祖記
至於另一場馬德里體育會對利華古遜，首回合落後0比1嘅馬體會返到主場出戰，Peter始終對施蒙尼呢位馬體會主帥有信心，何況首回合落後一粒並唔係乜嘢一回事，相信呢支上屆亞軍可以贏番一仗。

順便講埋聽晚兩場賽事，Peter認為巴塞隆拿主場大把在手，淘汰曼城晉級應該冇大問題，至於祖雲達斯雖然要作客多蒙特，但佢哋首回合領先2比1，加上喺意甲嘅消耗唔大，呢場有望和波晉級。

金句：英超歐聯絕地反擊靠晒雲格兵工廠