黃興桂：結構性問題令歐霸盃慘成雞肋

其實依家嘅歐霸盃，係以前嘅歐洲盃賽冠軍盃與歐洲足協盃合併而成，改個名算係幾好聽。不過唔係霸道個「霸」，而係霸晒啲比賽日子嗰個「霸」。

因為歐霸盃外圍賽階段，幾乎有百幾隊參戰，去到分組賽亦有12組合共48隊廝殺，搞到球隊個個禮拜都要飽受舟車勞頓之苦，最慘是獎金唔多，可謂得不償失，好多球隊都視之為雞肋，寧願早啲出局，專注番本土聯賽好過。好多主帥們認為歐霸盃霸晒球員嘅休息日子，即使殺到入決賽攞埋冠軍，但踢嘅場數比「金礦」歐聯仲多，但獎金就差天共地，由於賽制本身存在結構性問題，難怪呢隻盃嘅重要性每況愈下。

車仔要集中番精神
今晚英超車路士主場對修咸頓，Peter早前帶領英倫睇波團嗰陣，曾經睇過兩場車仔賽事，只要佢哋集中精神作戰，表現唔係咁差。昨日喺專欄都講過，上周中歐聯車仔被聖日耳門踢出局，其中一個原因係並非全程投入想贏波，反而係想贏得球證對己隊嘅有利判罰，並冇集中精神踢場好波搏盡爭勝。

今仗對住已跌至第7嘅「聖人」修咸頓，如今車仔可專注番踢聯賽，相信要贏波反彈一吐烏氣，難度應該不大。

金句：規模大獎金少 歐霸盃每況愈下有原因