英超：為求減壓大駁火曼市打吡拳拳到肉_東方日報
玩球网 2025-09-14 00:00:00
| 英超「曼市打吡」曼城主場火併曼聯，兩軍成績同樣令人失望，雙方領隊備受壓力，最佳減壓方法必定係取得「打吡戰」勝利，預料會豁出去鬥攻。事實上，「藍月亮」一向崇尚主攻踢法，「紅魔鬼」大事增兵後，進攻亦比以往銳利，加上兩隊近10次對賽有8次總入球開3球或以上，首選中位數2.5球嘅入球大。(Now 621及611周日晚11時30分直播）文:Mic少 曼城開鑼戰以4比0大炒狼隊後無以為繼，接連不敵熱刺、白禮頓，只有3分喺手，仲比曼聯少1分，對於近年做慣「曼市一哥」嘅「藍月亮」而言，絕對係奇恥大辱，更加要把握機會擊敗「紅魔鬼」，省靚金漆招牌。 夏蘭特腳風勁順 事實上，曼城鋒線力量仍有保證，尤其是前鋒艾寧夏蘭特腳風非常順，除咗聯賽3戰入3球之外，日前世盃外為挪威披甲對摩爾多瓦一戰轟入5球，加上雷恩達斯及貝拿度施華等中前球員亦具備上乘射術，要攻入曼聯嘅脆弱防線，並唔困難。 不過曼城亦有不利因素，門將艾達臣摩拉斯離隊，副選門將占士查科特表現欠佳，預料將會由新加盟嘅意大利鋼門基安盧基當拿隆馬擔正，默契不足之下，反而成為防線隱憂，難保清白之身。 另邊廂，曼聯雖然有兩位進攻主力馬菲奧斯根夏同美臣蒙特因傷缺陣，幸好麥比奧莫腳風順，計埋盃賽在內，已經連續兩場為「紅魔」貢獻入波。另一位鋒線新兵班捷文施斯高衝擊力強，預料可為曼城後防構成重大壓力。不過，曼聯防線仍然脆弱，今季各項賽事4場都有失波，包括英聯盃被乙組球隊甘士比攻入2球，恐怕難以抵擋「藍月亮」強攻，開2.5球入球大機會甚高。 |