社區盾：水晶宮利物浦細掀激鬥_東方日報
玩球网 2025-08-10 00:00:00
| 英超前哨戰爭搶頭彩 英超開鑼前哨戰社區盾爆發，聯賽盟主利物浦同英足盃冠軍水晶宮喺溫布萊交鋒。夏季大事增兵嘅利物浦，季前熱身盡顯火力，不過正式比賽唔會有咁多進攻空間，尤其水晶宮嘅體力化踢法，往往令主攻球隊難以適應。獎盃面前穩陣行先，2.5球入球細似樣。（Now 621周日晚10時直播）文:工廠仔 利物浦夏天簽入科利安華迪斯、伊基迪基、謝利美費林邦同米路斯卻基斯等新兵，今場可以悉數候命，陣容耳目一新。「紅軍」5場季前熱身賽4勝1負，火力毋庸置疑，不過佢哋5仗都有失波，合共失咗9球，呢種「有前冇後」踢法喺季前熱身好常見，但到正式埋牙肯定會謹慎得多。 體力型踢法抗紅軍 水晶宮喺暑假轉會市場非常淡靜，佢哋喺熱身賽有3勝1和2負，最重要係全程留喺歐洲集訓，免卻舟車勞頓嘅情況，球員狀態頗為理想，特別係防守方面，喺原班人腳再合作下，有望延續上季尾連續8場不敗走勢。 水晶宮踢法體力化，伊比爾治伊斯同桑馬迪達嘅反擊速度極高，將成為利物浦嘅心腹大患，令「紅軍」唔可以放手搶攻。事實上，利物浦近6次同水晶宮交手只贏過2場，當中有5場總入球開2球或以下，面對硬朗防守唔易食，今場再開2.5球入球細機會高。 |