熱身賽：狼隊同朗斯拍跳等睇入球騷_東方日報
玩球网 2025-07-30 00:00:00
| 英超球隊狼隊，就會喺英國西米德蘭茲嘅中立場，同法甲球隊朗斯「拍跳」。狼隊賣走王牌馬菲奧斯根夏，但進攻打法未減，朗斯更加係有前冇後，今場實多波入。（周四凌晨2時30分開賽）文:法達斯維 拿臣黃喜燦腳風不俗 狼隊今夏有進攻核心馬菲奧斯根夏轉投曼聯，左閘艾洛利亦去咗曼城，你話冇影響就假，不過佢哋及時補入西班牙進攻中場法盧比斯及巴西翼鋒祖漢阿里亞斯，算係止到血。最重要係主帥域陀彭利拿崇尚進攻風格未變，雖然今夏踢咗3場熱身賽，只得2和1負未贏過，但全部都有入波同失波，兩名前鋒佐真拿臣同黃喜燦均有士哥，可見狀態慢慢提升。 另邊廂，朗斯今季有前里昂教頭皮爾沙奇上任，一改以往保守打法，之前踢咗4場熱身賽，取得2勝2和，而且頻頻大手交易，共轟11球，全開3球或以上，就算對手唔算強，但睇得出佢哋前線，包括馬田沙迪安奴、韋斯利沙特、賴恩科芬拿等已經撻着晒，相信今場會繼續搶攻，隨時合演入球騷。 |