阿占：鳳凰阿德進攻大過天

今個周末，一班CABLE迷會由晏晝開始忙碌，因為新一季日職返嚟喇！今日嘅直播係球彩台兩場澳職同足球台兩場日職旯旮咁輪住嚟。睇番過去幾季，日職開鑼日嘅戰果係旺下盤居多，若果冇乜心水，不妨跟吓路。

講番澳職，前列形勢前所未有咁緊湊，依家聯賽前5名嘅球隊，只係3分差距，所以佢哋喺跟住落嚟嘅比賽，真係唔可以有乜差池，否則好易畀對手放甩。其中排第5嘅威靈頓鳳凰今日主場迎戰「四哥」阿德萊德聯，就係場好關鍵嘅大戰。兩隊排名雖然相差一級，但查實係同得33分，只落後榜首3分，大家都好想K.O對手，咁爭標路上就可以少隻鬼！由於雙方都係澳職入面火力最強嘅球隊之一，今場大戰睇怕入波唔會少，一於玩1.65倍入球大！

緊迫榜首不容有失
威靈頓鳳凰教練梅里克向來崇尚進攻，上季球隊雖然排尾二，但入波比聯賽亞軍同季軍都要多，證明好攻得！佢哋今季踢咗19輪入咗35球，火力暫時係全聯賽第2。賽前會方仲宣布同梅里克續約3年，反映出好受落佢嘅主攻踢法，加埋佢哋早前更簽入35歲殿堂級射手祖爾格菲斯，以呢位老人家嘅經驗同卡士，絕對有助提升火力。

另邊廂嘅阿德萊德聯火力亦有番咁上下，共入咗34球，當中西班牙射手柏保路山齊士近3場有2球進帳，狀態唔錯，佢同迪捷特組成嘅鋒線亦好對辦。睇番雙方近5次交手都一定有波入，其中3場更順利開出入球大。以兩隊近期嘅火力同今場爭勝決心，大家有望可以欣賞到入球騷啦！

（有線64及203周六中午12:00直播）

頂占筍盤：威靈頓鳳凰（入球大）
有線球彩台主持阿占