蘇斯黑柴 ：神奇奧堡回緊氣 追禾堡客Ｗ

黑柴自細睇波都鍾意挫強扶弱，雞蛋與高牆之間，幾時都站喺雞蛋嘅一方，最欣賞實幹型教練，喺有限資源下交出好表現好成績。近季一直欣賞弗賴堡教頭施特拉希化腐朽為神奇嘅功力，代表作係2011-12年球季，球隊踢完半季位列包尾，歇冬期仲因為財困賣走晒所有值錢球員，包括之前一季德甲二號神射手柏比斯施斯，搞到要喺奧地利同瑞士次級聯賽執咗一批廉價勞工頂檔，黑柴當年都批死佢哋必降，結果施特拉希竟然帶領球隊護級成功，施特拉希令黑柴跌晒眼鏡，亦因此成為黑柴偶像之一。

不過近兩季黑柴又有新寵，奧格斯堡教練韋恩薛亞亦擅於「無米炊」，呢位剛滿四十歲嘅少帥前季季前接手球隊，蚊型球會冇錢擴軍，只能用失意老兵帶領小將同群雄角逐，第一季排15位護級成功，上季喺完全冇人睇好下有大幅進步，以第八名過終點，今季竟然可以更進一步，一度躍升三甲位置，近期狀態稍跌仍位列前六，成績拍得住巨型班利華古遜同史浩克，韋恩薛亞令球隊不斷延續並創造更大神奇，值得為佢鼓掌。

奧格斯堡上季三月最差
不過，無論韋恩薛亞有幾神奇，喺以老帶新同兵源有限下，難免要經歷回氣期，上季奧格斯堡成績最差嘅時候正係三月份，踢咗六場波只得五分，令球隊最終無法衝擊歐戰席位。今季嚟到呢個階段情況相若，近三仗只得一分，一批老兵包括曼寧加、布歷卡同哈利艾天托普都要回氣，今晚奧格斯堡主場面對歇冬後全德甲狀態最勇嘅禾夫斯堡，未係時候走出低谷，推介禾夫斯堡客Ｗ。

（周六晚10時30分開賽）