黑柴自細睇波都鍾意挫強扶弱,雞蛋與高牆之間,幾時都站喺雞蛋嘅一方,最欣賞實幹型教練,喺有限資源下交出好表現好成績。近季一直欣賞弗賴堡教頭施特拉希化腐朽為神奇嘅功力,代表作係2011-12年球季,球隊踢完半季位列包尾,歇冬期仲因為財困賣走晒所有值錢球員,包括之前一季德甲二號神射手柏比斯施斯,搞到要喺奧地利同瑞士次級聯賽執咗一批廉價勞工頂檔,黑柴當年都批死佢哋必降,結果施特拉希竟然帶領球隊護級成功,施特拉希令黑柴跌晒眼鏡,亦因此成為黑柴偶像之一。 不過近兩季黑柴又有新寵,奧格斯堡教練韋恩薛亞亦擅於「無米炊」,呢位剛滿四十歲嘅少帥前季季前接手球隊,蚊型球會冇錢擴軍,只能用失意老兵帶領小將同群雄角逐,第一季排15位護級成功,上季喺完全冇人睇好下有大幅進步,以第八名過終點,今季竟然可以更進一步,一度躍升三甲位置,近期狀態稍跌仍位列前六,成績拍得住巨型班利華古遜同史浩克,韋恩薛亞令球隊不斷延續並創造更大神奇,值得為佢鼓掌。 奧格斯堡上季三月最差 (周六晚10時30分開賽) |