Mic少：皇馬賀壽數爆畢爾包

C朗財色兼收 18億膺「首富」
C朗羊年財色兼收，憑源源不絕嘅贊助、廣告代言人合約，加上個人品牌CR7商業收入，以1.523億鎊（約18億港元）身家，力壓勁敵美斯，榮登現役球員首富！呢位皇馬射手感情亦有新動向，傳搭上墨西哥索爆女主播Vanessa Huppenkothen，可謂商場、情場兩得意。今晚西甲勢必率領皇家馬德里作客大炒畢爾包，賀「銀河艦隊」創會113年，Mic少直取讓球客勝。

（now 632周日凌晨1時直播）

根據外國足球網站Goal.com公布嘅現役球員十大富豪榜，C朗以1.523億鎊身家成為一哥，比次席美斯多出超過700萬鎊（約8,000萬港元）。呢位葡萄牙國腳勝在靚仔有型，深受各大品牌垂青，爭相請佢拍廣告、做代言人。佢亦不忘以個人名氣，喺商界搵真銀，旗下品牌CR7出產時裝、鞋等用品，為荷包帶來巨額進帳。C朗好勤力往往親自為CR7擔任模特兒，最新一輯CR7休閒鞋廣告，打扮似足已故樂壇天王米高積遜，大跳moonwalk同break dance舞步。佢仲喺社交網站留言話：「急不及待想向你展示，我覺得好有趣。」原來C朗係舞林高手，唔知今場入波會唔會跳番隻《Beat it》慶祝呢？

撻着墨西哥女主播
自從同索模伊蓮娜分手後，C朗頻頻有女埋身，西班牙傳媒爆料，指佢已同墨西哥女主播Vanessa Huppenkothen秘密撻着。現年29歲嘅Vanessa喺上年世界盃爆紅，佢之前同富商結束三年婚姻後，同C朗兩顆寂寞的心相遇，自然好易擦出火花。

講番今晚西甲場波，皇馬上下都非常重視，事關昨日係球會成立113年紀念日，極希望以贏波賀壽；相信C朗、加里夫巴利、賓施馬等巨星會全力數胡。皇馬首循環大炒畢爾包5比0，相信今仗作客都要繼續派蛋贈興。