雷法爾：FC悉尼客W碌爆「卡」

噴射機理應一飛沖天、傲視天下，偏偏泊喺澳洲新南威爾士省嗰架紐卡素噴射機，今季長期都撻唔着，佢哋家陣踢多2場都只能僅僅壓住榜尾西悉尼流浪者3分排尾2。更大鑊係呢架噴射機近年對親FC悉尼例必死火，今場就算佢哋主場出擊，相信都難逃一敗，FC悉尼1.68倍客勝捧得過。

（有線64及203周五下午4:40直播）

噴射機飛悉尼例死火
噴射機今季19戰贏得1場咁大把，失分失到乜信心都冇晒，加上失咗40球「榮膺」失波王，好難想像呢班波可以憑乜搶分！

雖然話中場簡達路夫斯基今仗刑滿復出，不過佢哋對住FC悉尼已經連食361分鐘白果，仲要撞正前鋒艾臣蒙達路呢排鬧入球荒，點捧得落手？

相反對手FC悉尼愈戰愈勇近5戰取得4勝1和佳績，「升呢」成為其中一隊爭標分子。何況首席射手真高近期着晒火，連續5仗入波合共轟入8球，唔講唔知呢位奧地利前鋒作客零舍醒神，作客入球佔總入球數字逾7成，有佢孭飛，要拆散噴射機唔係難事。