美斯謙：ＦＣ悉尼客戰噴射機旺大

澳職今日下晝有場獨腳戲，由紐卡素噴射機主場對ＦＣ悉尼。噴射機近期連和3場，表現比之前有進步，今仗主場出擊自然希望搵到久違嘅勝利。不過，ＦＣ悉尼近7仗未輸過氣勢如虹，噴射機想贏唔係易事，但ＦＣ悉尼近期入得又失得，已經連續5場開出大盤，阿謙估計今場入波應該唔會少，1.72倍大盤值得支持。

（有線64及203周五下午4時40分直播）

噴射機自重整架構後已逐漸回復正常水平，近3仗皆打和對手表現似乎有番啲起色。噴射機今仗雖有門將雲史特坦、後衞高般恩、中場祖舒巴里斯同占士域基利因傷缺陣，但有中場簡達路夫斯基及後衞安祖賀利坐完波監復出，令球隊實力更趨完整，今仗主場出擊相信都會主動搶攻，務求取得久違嘅勝利。

真高5仗入8球着晒火
ＦＣ悉尼近7仗取得4勝3和表現非常穩定，主力射手奧地利前鋒真高近5仗入8球可以話「着晒火」，今仗要喺噴射球身上取得入球相信唔係難事。不過，ＦＣ悉尼近5場賽事都有失波，證明防線唔係咁穩陣，今仗仲有後衞謝斯巴治及中場泰華利斯停賽，加上後衞積基斯法迪及奧尼洛夫斯基、中場歷克卡利及艾希爾菲，以及前鋒哥利加美路因傷缺陣，要保住清白之身相信唔係易事。而且，ＦＣ悉尼近5次作客噴射機有4次開出大盤，呢個對決似乎都幾旺多波入，阿謙睇好今仗隨時上演入球騷，捧有1.72倍嘅大盤。