韋根“史”命必達
英超護級形勢好睇過戲，除雷丁與昆士柏流浪宣佈死亡外，另一支降班球隊仍未揭曉，至少有六支球隊仲要掙扎求存，特別排尾三的韋根，食粥食飯要睇餘下三場關鍵戰，今晚第一關先過史雲斯，許勝不許和情況下，必需全攻型撲擊對手。
史雲斯已經一早上岸，自從捧走聯賽盃後，似乎無心戀戰，近八場聯賽只得一勝，求勝慾望稍嫌不足，今戰作客韋根，戰意成疑，初盤韋根讓半球，當然捧搏殺指數十足的韋根可以守得“雲”開見月明。
韋根領隊馬天尼斯“人緣”真係唔錯，上仗對西布朗在兩度落後形勢下反勝對手，唔單止“意外”攞到救命三分，對球隊士氣嚟講更加打支強心針，護級現一絲曙光。雖然周日要與曼城爭足總盃，但相信馬天尼斯以護級為重，集中火力打聯賽，順便提提大家一個重點，馬天尼斯球員年代曾經為史雲斯效力，無功都有勞，既然史雲斯無憂無慮，話唔定“有得傾”。
史雲斯攞個聯賽盃，下季又可以參加歐霸盃，球會經已大功告成，例行公事，順手送人一程。
推介：韋根二比一