SAMVO肥叔：侯城食到飽防獲利回吐

自從歐聯重開後，帶動周中賽事交投暢旺，但估唔到三支英超球隊車路士、曼城同阿仙奴於16強首回合都贏唔到波，當中尤以阿仙奴主場1比3爆冷輸畀摩納哥之役，跌到一地眼鏡碎。不過眾人皆醉我獨醒，大戶偏偏睇中呢場，無論賽前受讓一球，定係臨場摩軍領先1比0同2比0嗰陣繼續受讓，佢哋總共追咗三「浸」，最終大獲全勝，果然眼光獨到，證明歐聯16強冇弱隊，就算法甲「梗頸四」嘅摩納哥都不能睇小，千祈唔好盲目信晒名牌球隊。

史篤城硬淨讓得起
言歸正傳，今晚重心推介賽事係英超「雙城戰」，史篤城主場迎戰侯城，後者連贏兩場係威係勢，但兩場均於主場出擊兼對手只係沉爆嘅阿士東維拉同昆士柏流浪，不宜高估。睇番侯城之前九仗作客僅得一勝之餘，當中有六場輸波而回，證明呢隻「老虎」淨係識得喺自己地頭發威；史篤城一向硬淨，連傷咗一排嘅隊長梳爾哥斯都有望復出鎮守防線，初盤讓半球亦屬合理，況且侯城連搶六分食到飽晒，慎防獲利回吐，史篤城上盤值得捧場。

（now 625周六晚11時直播）

至於早少少開波嘅德甲賀芬咸主場對緬恩斯，前者歇冬後五場輸咗三仗，緬恩斯由新帥馬田舒密特接手後，上仗即刻反勝法蘭克福，睇嚟「新帥效應」仲會玩多一排。賀芬咸要讓波純粹因主場關係，肥叔寧願追多緬恩斯一鋪。

（周六晚10時30分開賽）