張健峰：巴塞3.95倍 讓和仲過癮

對CF格蘭納達畀主力抖陣
完成歐聯16強首回合賽事後，巴塞今晚又要趕返西甲造訪CF格蘭納達。由於佢哋喺上輪聯賽意外輸畀馬拉加全失3分，搞到聯賽再次落後榜首皇馬4分，想爭標已經再冇失分空間。雖然話佢哋戰意鮮明贏波冇難度，之不過巴塞近期賽程頻密，今仗未必去盡炒起對手，「-2」讓球和有3.95倍咁好分頭值得一試。

（now632台周六晚11:00直播）

「地上最強」喺周三歐聯16強首回合作客曼城，憑住「哨牙蘇」蘇亞雷斯加盟後首次梅開二度險勝2:1。雖然該仗美斯喺比賽尾段12碼宴客，但佢成場波勁誇張咁錄得12次突破扭波10次成功嘅紀錄，1個人已經搞到曼城守將疲於奔命，難怪賽後主帥安歷基仍然對美斯投下信心一票。

之不過安歷基亦意識到球隊近期要3線作戰，今晚有幾個位會輪換下，攞到領先優勢仲隨時換走美斯、恩尼斯達等主力休息。何況巴塞「齋搓唔攻」嘅能力一向出色過人，贏住2粒隨時玩馬騮搶波搓完場都唔奇。

首循環巴塞炒6粒
另邊廂CF格蘭納達暫列聯賽尾二，佢哋由上年9月尾到依家聯賽只係贏過1場咁大把，加上佢哋喺首循環作客魯營球場吞咗6隻光蛋，想班波爆冷擊敗巴塞真係天方夜譚。好在今晚CF格蘭納達有地利，有望拉近同「地上最強」嘅距離。話晒佢哋今次喺自己地頭比賽，梗係要喺班鄉親父老面前踢得好好睇睇，就算輸都唔好再喪吞蛋咁樣衰吖。