樂比堅尼：西布朗當頭起受讓等修錢

英超前四爭持激烈，各隊都對下屆歐聯入場券虎視眈眈，不過樂比深信修咸頓最終都係陪太子讀書，畢竟「聖人」路數已被睇通，射手加斯安奴柏利更陷入球荒，易帥後愈戰愈勇嘅西布朗有力搶分，主場受讓平半，1.94倍下盤值捧。

（now622台周六晚11:00直播）

修咸頓前線啞火
賭波最緊要係捉緊時機，好多時就係靠操盤手嚟唔切調整賠率，贏個時間差，好似今場西布朗對修咸頓咁，兩隊狀態明顯一起一落，西布朗近況甚勇，自佩尼斯接手領隊職務後，近9仗僅輸1場，相反「聖人」卻有下滑迹象，近5戰只錄得1勝，仲要係補時險勝護級隊伍昆士柏流浪，今場作客對西布朗讓平半明顯係多咗，睇番上季呢個對賽組合，當時西布朗要讓番修咸頓平半，所以西布朗今場受讓，確實吸引。

其實樂比一向好欣賞西布朗領隊佩尼斯，因為佢過往無論執教史篤城、水晶宮或依家嘅西布朗，都係用蔗渣價錢踢出燒鵝味道。佩尼斯除戰術運用得宜，最重要係擅於控制更衣室氣氛，好似佢搵新加盟嘅費查擔任隊長，唔單止冇令新舊兩派球員分化，球員仲紛紛走出嚟講好說話，可見班人團結之餘，仲好肯為佢賣命。

西布朗以往最令人詬病係火力不足，但近期打起嘅尼日利亞射手伊迪耶（白衫），近3仗射入3球，腳風頗順，反觀「聖人」近期就真係唔識入波，過去4場賽事360分鐘共出現65次射門，但僅入得1球。意大利射手加斯安奴柏利近排啞晒火，佢喺頭8場聯賽射入6球，近18場聯賽就只入得2球，至於佢嘅拍檔沙恩朗踢法一直同修咸頓格格不入，加上受傷患困擾今季僅得2球進帳，試問入球能力咁低，作客又點讓波？

樂比推介
西布朗（下盤）