九叔：飛腳 紅鑽做大騷

日超盃志在表演鬥入波
象徵住新一屆日職開鑼嘅日本超級盃，今年喺橫濱日產體育場爆發，剛啱一齊响亞冠盃輸波嘅大阪飛腳、浦和紅鑽，賽前都話希望捧番個盃重新振作士氣，1.85倍入球大值得一博。

（有線61、201周六下午12:35直播）

飛腳簽新前鋒赤嶺真吾
飛腳、紅鑽係舊年日職冠亞軍，兩隊當時鬥得好激烈，勝負之差只係1分，實力非常接近。喺休季期間，飛腳冇乜大動作，新簽嘅球員入面，係得件前鋒赤嶺真吾叫做有啲斤両，其他大部分由青年隊提升上嚟，除咗今野泰幸季初養傷，主力陣容同舊年冇乜大分別。

紅鑽嗰邊相對積極一啲，橋本和、石原直樹、隆比真歷幾件新兵，都係柏雷素爾、廣島三箭同大宮松鼠嘅骨幹，對佢哋嘅攻守都有補強嘅作用。換言之，只要磨合得好，紅鑽嘅整體質素同飛腳會愈拉愈近。

紅鑽積極增兵攻守補強
如果由對賽往績去睇，呢兩隊真係勢均力敵，雙方對戰40次，飛腳以17勝10和13負稍稍佔先，舊年佢哋喺聯賽交鋒，大家各贏一場，真真正正係半斤八両。不過，千祈唔好忘記一點，就係今場雖然號稱超級盃，算得係一項錦標，但係對所有參戰球隊嚟講，實際係無關痛癢，輸咗都冇乜損失，有好濃嘅表演意味，所以飛腳、紅鑽喺06、07年兩屆超級盃碰頭，都出現大手交易，06年紅鑽贏3:1封王，07年飛腳數番對方4蛋捧盃，各自威一次，今場隨時又係Show Time，開大好正常。

日超盃賽制：
今場為決賽，法定時間內打和不設加時，即以互射12碼決勝。