打3打4為圓歐聯夢
今季英超爭霸形勢簡單，冠亞軍早已係車路士同曼城之爭，反而涉及來季歐聯參賽資格嘅第3、4位嘅競爭卻非常激烈，由第3位嘅阿仙奴至第6位嘅利物浦之間僅有3分差距，而暫居第4嘅紅魔鬼曼聯同排第5位嘅聖人修咸頓之間更只差1分，聯賽仲有12輪，故變數極大。曼聯同修咸頓今晚分途出擊，每一分都要打「3」打「4」，若有閃失入唔到前4，歐聯搵銀夢隨時成空。 修咸頓頹爆征西自求多福
積分榜排第5嘅「聖人」修咸頓今晚作客西布朗，以其頹爆近態，想砌低矢志搶分護級嘅西布朗絕唔容易，仲要讓平半，斯維當然撐西布朗下盤。 （now 622周六晚11時直播） 去年夏天修咸頓被撬走大半隊主力，好彩主帥朗奴高文挖到加斯安奴柏利、杜辛泰迪治等好嘢，加上在一致被睇低下反而踢出爭氣波，依家位列上游，更有機會爭取來屆歐聯入場券。不過，睇番修咸頓近況就真係唔開胃，之前5仗錄得1勝1和3負，所贏嗰仗都只係靠補時入波擊敗弱旅昆士柏流浪，表現頹爆，更何況今仗仲有伊斯哥維、積洛迪古斯、馬約卡及森加歷查等因傷缺陣，連兵源調動都有問題。 西布朗護級冇保留
西布朗方面，自從上季英超最佳領隊佩尼斯於1月接手，表現穩步上揚，近9仗只曾不敵神勇嘅熱刺，暫時甩開尾三嘅般尼5分排第14，佩帥最擅長限米煮限飯，激勵球員重拾信心，以高價來投嘅前鋒伊迪耶上半季冇料到，但在佩帥麾下全面復甦，近4仗入4粒，拍住比拉希奴於前線如魚得水，由於西布朗仍未脫離護級漩渦，撞正態沉兼殘陣嘅修咸頓，仲唔搏命搶分咩？加埋地利又有得受讓，下盤實在不容錯過。 | 
