法達斯維：雲格領兵降摩

君子報仇廿年未晚！
今晚歐聯16強首回合上演復仇之戰，「兵工廠」阿仙奴主場火併法甲勁旅摩納哥。「教授」雲格當年對摩納哥有情有義，可惜畀個良心當狗肺遭無情炒魷，塞翁失馬焉知非福，反而喺阿仙奴落地生根名揚天下，事隔二十年後重遇無良舊東家，無論為阿仙奴洗脫「歐聯16哥」惡名，定係為自己爭番啖氣，雲格誓要大勝一場威番鋪，斯維力撐讓球主勝。

(有線61及64台周四凌晨3時45分直播)

當去年年尾歐聯16強抽籤阿仙奴抽中對摩納哥時，主帥雲格一定百般滋味在心頭，1987至94年間，「教授」正係執教呢支法國勁旅，唔單止勇奪聯賽及法足盃等錦標，佢以個人魅力先後說服到荷杜、史斯富、奇連士文等球星加盟，並培養出世界足球先生韋亞等可造之材，打出漂亮嘅進攻足球，94年更獲得德甲班霸拜仁慕尼黑力邀過檔，但摩納哥堅決唔放人，雲格亦有情有義決定留隊。點知前後唔夠幾個月，94-95年球季因為開咧跌落下游，摩納哥立即變臉怒炒雲格，搞到忠心耿耿嘅「教授」一度心灰意冷，若非後來遠赴日本接手名古屋八鯨，猶如「心靈假期」般醫好其內心傷痕，重拾對足球嘅興趣，佢隨時早已退出球壇，亦冇之後在阿仙奴嘅輝煌事迹。

決洗歐聯16哥污名
塞翁失馬焉知非福，96年雲格來到阿仙奴後，將呢支「魚生粥部隊」嚟個華麗轉身，塑造成英超最好睇嘅兵工廠，04年不敗奪冠更堪稱經典，唔經唔覺，今年係「教授」在阿仙奴嘅第19個年頭，為現役執教時間最長嘅英超領隊，上年更拒絕摩納哥邀請回巢。不過，這名曾在歐洲三大盃（歐聯、歐洲盃賽冠軍盃及足協盃）決賽落敗嘅一代宗師，依然對歐聯錦標念念不忘，阿仙奴近四屆一踏入淘汰賽首圈即行人止步，更被嘲笑為「歐聯16哥」。

摩納哥靠小將撐場
好彩，雲格嘅舊東家摩納哥已今非昔比，老闆魯博洛夫列夫閂水喉之餘，去夏仲將哥倫比亞球星占士洛迪古斯高價售予皇馬，法卡奧又借埋畀曼聯，陣中剩番「hea碧」貝碧托夫同摩天奴較有級數，靠法賓奴泰華利斯、貝拿度施華、馬菲斯卡維奴等小將擔大旗，踢法甲都仲勉強OK，嚟到水準更高嘅歐聯就窄窄哋，加上中場重心杜拿蘭要坐波監，實力大削。相反阿仙奴之前九仗主場比賽贏晒，當中有六場贏兩粒或以上，阿歷斯山齊士、奧斯爾、辛迪卡索拉、基奧特於前線穿花蝴蝶般嘅配合，既好睇又實際，佢哋亦想為「教授」報番當年炒魷之仇，火力全開唔係人咁品，讓球主勝咪錯過。

歐聯Statistics
阿仙奴 數據 摩納哥

6 比賽 6

15 入球 4

53 控球率(%) 47

69 進攻 56

25 射門(中框) 14

27 射門(不中框) 26

17 被封阻 16

3 中柱 1

26 角球 27

12 越位 23

10 黃牌 16

1 紅牌 0

80 犯規 94

63 被侵犯 100

2925 傳送 1918

2601 成功傳送 1556

判官look一look：艾迪堅
國籍：德國

年齡：36

曾執法主要大賽：德甲、歐聯、歐霸盃、16歐國盃外圍賽、14世盃外圍賽

執法場數：34

黃牌數：148

平均黃牌：4.35

紅牌數：10

平均紅牌數：0.29

判12碼：16

平均判12碼次數：0.47

今屆執法場數：2

黃牌數：10

紅牌數：1

判12碼：0