卡爾萬：馬體會平手圖「利」 文迪蘇傑 基沙文Fit到痹

今晚利華古遜會喺主場迎戰馬體會，「藥廠」中堅奧馬托柏克今場坐波監，拍檔史柏希斯又患上「床單恐懼症」，防線中門大開，撞正弗到漏嘅馬體會箭頭文迪蘇傑同基沙文，睇怕好難有運行，平手盤撐「床單兵團」！

（有線62及202周四凌晨3:45直播）

利華防線中門大開
「藥廠」喺德甲歇冬後表現麻麻，5戰只得1勝2和2負，而且近3場更狂失9球猶如不設防。最弊係今屆歐聯分組賽場場踢正選嘅奧馬托柏克同史柏希斯，前者今場要停賽，後者之前効力西維爾嗰陣，4度面對「床單兵團」1場都未贏過，話佢有「床單恐懼症」都不為過，防線中門大開唔大敗都偷笑！

相反馬體會鋒線近期弗到震，上場西甲鬥艾美利亞，箭頭文迪蘇傑先拔頭籌後，再兩度助攻基沙文入波，兩人近4場聯手貢獻8球。加埋教頭施蒙尼盛傳將續新約到2022年振奮士氣，今場要撕破利華條防線唔係難事，而且馬體會近5場歐聯1球都冇失過，近況勇、往績靚，平手盤唔捧等幾時？