美斯謙 ：惡氣學生招呼ＳＣ巴斯隆拿

自由盃聽朝會進行幾場分組賽，其中第7組嘅學生隊會喺主場恭候SC巴斯隆拿造訪。學生隊近期走勢強勁，加上球隊主場表現甚具惡氣，今仗面對作客表現一般嘅SC巴斯隆拿，阿謙相信佢哋贏波應該毫無難度，主W屬不二之選，進取嘅可以捧埋讓球主勝。

（周四早上6時45分開賽）

有前有後着晒火
阿甲嘅學生隊近期表現可以話係「着晒火」，最近3場波贏晒之餘更入咗7球只失1球，表現可以話係「有前有後」。學生隊現時除中場路文馬天尼斯因右腳足踝有傷上陣成疑外，其餘主力皆冇傷冇病可以夫添上陣，今仗主場出擊贏波應該冇難度。

厄瓜多爾球隊SC巴斯隆拿近況只屬一般，啱啱喺聯賽作客1比2輸咗畀國家體育會，未能喺出征阿根廷前壯行色。SC巴斯隆拿後衞謝臣杜明基斯今仗因傷無法上陣，縱然陣中擁有兩位阿根廷外援前鋒伊斯美白蘭高及費斯索迪，再加上烏拉圭後衞拿馬斯，但要擊敗坐擁主場之利嘅學生隊相信唔係易事。阿謙今仗睇好學生隊可以喺主場奏凱，進取嘅可以捧埋讓球主勝添！