科娜：鹿角蓄銳大起攰爆流浪者

另一場H組賽事，由日職嘅鹿島鹿角喺主場迎戰衞冕球隊西悉尼流浪者。鹿島鹿角今場養精蓄銳，又有強援甸尼爾加盟，攰爆嘅西悉尼流浪者今場輸波都實屬正常，不過考慮到1.43倍嘅主W太熱冇肉食，不如博吓玩1.72倍嘅大盤仲和味。

（now 670周三晚6時直播）

流浪者連場征戰腳仔軟
趁住新一季日職未開咧，鹿島鹿角現時全心全意備戰亞冠盃，相反澳職踢得如火如荼，喺聯賽做緊包尾大幡嘅西悉尼流浪者剛作客完阿德萊德聯，抖咗幾日又要再遠征日本，堅係頂唔順喎！

流浪者貴為上屆冠軍，但科娜就唔多睇好呢支衞冕球隊，事關佢哋今季表現勁跌Watt，作客成績更係差到冇眼睇，表現曳爆，加埋班球員連場征戰腳仔軟，好難擋得住鹿島鹿角一條強勁嘅攻擊鋒線。鹿島鹿角得到維多利亞首席前鋒甸尼爾加盟，加上球隊頭號射手達維留隊，攻力更上一層樓，咪諗咁多一於捧大盤！