笛子波童：FC首爾羊城偷雞

恒大簡Sir掌帥未上手
亞冠盃今日續演首輪分組賽，H組重頭戲中超班霸廣州恒大淘寶（足智彩譯：FC廣州）主場迎戰南韓勁旅FC首爾。恒大今季陣容、領導層皆有大變動，球隊上下料需時適應。FC首爾上圈7比0大勝越南代表FC河內寓賽於操，狀態比主隊有過之而無不及，首爾喺13年亞冠盃決賽兩鬥恒大都唔使輸，波童今場捧2.6倍讓球客勝。

（now 671周三晚8時直播）

恒大今季大執位，納比退居幕後擔任球隊顧問，主教練一職由愛徒「大簡」簡拿華路接手，姑勿論「大簡」之前冇實際教波經驗，球隊早前有七名國腳代表國足出戰亞洲盃，初來甫到嘅「大簡」根本冇太多時間去了解旗下球員。納比和助教馬達洛尼喺上屆８強首回合對西悉尼流浪者因衝入球場同球證理論被罰停賽，今場只可在看台觀戰，恐怕對「大簡」嘅臨場調動幫唔到幾多。

中場郜林坐波監 主隊影響大
陣容方面，恒大今季放走兩名意大利星級外援基拿甸奴及迪亞文迪，重金羅致兩名巴西兵阿倫杜格拉斯及列卡度高拉特，前者替薩爾斯堡於今屆歐霸盃射入八球，質素毋庸置疑，但從上場中超盃只能悶和FC山東嚟睇，兩名新援後備入替似乎仍未融入球隊，發揮有待改善，加上中場主力郜林要坐越季波監，今場無法上陣，整體戰鬥力再打折扣。

FC首爾上季喺國內聯賽排第三，今屆要踢外圍賽先可進身分組賽，結果佢哋上周以狂風掃落葉姿態大勝越南球隊FC河內7比0，大大提升比賽狀態及信心。前國腳崔龍洙於11年開始執教球隊，曾經帶隊喺13年亞冠盃決賽兩鬥恒大保持不敗，最終僅以作客入球條例落敗而屈居亞軍，領軍功力比「大簡」有保證，今次信FC首爾作客可保不敗，捧讓球客勝。