黃興桂：兵工廠近況佳睇高一線

今日係初七人日，即係人人生日，今晚波馬齊開非常熱鬧，不過Peter覺得快活谷馬場鬼咁多人，仲要跑九場，幾乎場場出賽馬匹數目都爆棚，咁混亂都幾難揀，倒不如專注夜啲嘅兩場歐聯16強首回合好過。

阿仙奴主場迎戰摩納哥，後者今季於法甲每況愈下，只係排梗頸四啫，筆者認為阿仙奴近況唔錯，箭頭基奧特更加腳風甚順，難得今屆抽到支好籤，只要今仗打得醒神啲，趁住有地利贏番一至兩粒，便好大機會躋身八強，因此阿仙奴值得睇高一線。

馬體會平手盤勁筍
另一場德甲球隊利華古遜主場對西甲勁旅馬體會，牌面嚟睇好似不相伯仲，只因馬體會作客緣故，呢支上屆歐聯亞軍踢法硬淨，有料教頭施蒙尼又感染力強，能夠激勵士氣帶起眾將嘅戰鬥力，其瘋狂逼搶打法，連「銀河艦隊」皇馬都畀佢哋打到有氣冇碇抖，利華古遜好難頂得住，由於主客和有三瓣較難估，但讓球盤卻開出平手盤咁筍，不如簡簡單單捧馬體會平手盤。