初五放工有咩搞作先?卡利亞里今晚喺意甲主場對國際米蘭啱唔啱睇呀?自從卡利亞里請蘇拿領軍護級,佢哋就場場同對手駁火,撞啱國米喺文仙尼帶領下火力全面回歸,畀面兩個星級教頭就玩入球大啦! (TVB301台周二凌晨4:00直播) 卡利亞里搵蘇拿做新教練後,對上8場得2勝2和4負,戰績唔算標青,但期間除咗上星期作客以1:1打和拖連奴,其餘7場全部開入球大,而且蘇拿自己都話,對拖連奴多得門將貝基治上晒身,否則肯定唔止失1球,證明蘇拿都覺得個後防完全唔掂。 國米連續3場入3球 或者文仙尼帶曼城嘅時候,進攻板斧唔算多,但佢返到國米,就好似拎住支機槍向對手掃射咁,唔計新加盟嘅翼鋒梳頓沙基利連續2場入波,射手柏拉斯奧都全面翻生,中場古亞連更加有入球有助攻,踢到曉飛咁款。總之文仙尼對蘇拿,等睇入球騷! |