李榮基：腦殘攪亂檔破壞紅軍和諧

由於馬年香港社會氣氛唔多和諧，又有好多空難發生兼流感肆虐，因此新一年先祝香港各界一團和氣、讀者個個身體健康！

新正頭送「一團和氣」畀利物浦亦非常適合，大家都知紅軍自從隊長謝拉特宣布季尾離隊後，全隊上下眾志成城想送番份告別禮畀佢作美好回憶，成班波生晒一鼓作氣狂衝，加上領隊羅渣士經歷過季初陣痛期後，近期改用類似343陣式，攻守漸趨平衡，近9場聯賽保持不敗之餘更贏咗6場，班波可以話狀態大勇。

修咸頓 只想「身體健康」
可惜「腦殘」巴洛迪利上周中歐霸對比錫達斯又攪亂檔，呢位意大利麻煩友心中就一向無「一團和氣」呢四個字，為咗入波漠視隊規搶射12碼，引嚟老臣子謝拉特同名宿列納齊聲炮轟，好在史杜歷治同佐敦軒達臣大人有大量唔同佢爭，球隊亦總算贏波收場，內訌問題先得以淡化。

修咸頓嗰邊，我就送句「身體健康」畀佢哋啦！「聖人」近期戰績下滑，近4次主場出戰只得2和2負，同班波飽受傷兵困擾有關，今仗前鋒沙恩朗、中場舒尼達連、後衞艾達韋列特都上陣成疑，左閘賴恩貝特蘭停賽，而首席射手加斯安奴柏利踏入2015年又完全死火，只靠沙迪奧文尼一人力撐，導致班波近3戰只入得1球。

至於朗奴高文之前攞到1月份英超最佳領隊後，又真係唔到你唔信邪，班波即刻似中咗詛咒，喺2月份出戰嘅聯賽只取得1勝1和1負。今晚列基林拔、拉爾拉拿及洛夫雲3名「聖徒」叛將重返聖馬利，即管睇下修咸頓Fans會否用噓聲招呼佢哋？（now621台周一凌晨00:15直播）