樂比堅尼：里昂係時候反彈 蒙彼利埃有「甘」執

歐聯歐霸盃歇冬後重開，部分球隊兩線作戰負擔沉重，尤其係一啲中型班，本身後備兵力唔夠，隨時搞到兩頭唔到岸。法甲甘岡今屆有得踢歐霸盃，難得32強首回合擊敗勁旅基輔戴拿模，相信個心已飛咗去烏克蘭，今晚主場對蒙彼利埃讓唔起平半（開賽時間：周日晚9:00），同晚里昂則相信可輕取南特

（TVB302周一凌晨0:00直播）。

歐霸盃被視為雞肋，原因係一般星期四晚踢完，抖兩日又要踢聯賽，球員好難回復100%狀態。以今場甘岡為例，由於佢哋喺法總同法聯盃都殺入8強，過去6個星期比賽相當頻密，只得一個周中冇波踢，而歐霸盃又踢到生死關頭，要知道甘岡呢啲鄉下球會，只係第3次參加歐霸盃（計埋前身歐洲足協盃），難得入到32強兼首回合贏波，梗係想再晉一級光宗耀祖。

畢竟甘岡聯賽排緊第8冇乜好爭，就算真係想爭歐霸盃入場券，不如寄望法總捧盃好過。相反蒙彼利埃盃賽早早出局，加埋上周聯賽改期有大把時間備戰，佢哋目前聯賽領先甘岡1分兼少踢1場，只要今場搶分成功，仲有機會挑戰前列位置，點計都肯定勝一籌。

甘岡聯賽冇嘢好爭
同晚另一場法甲則推介里昂，沉寂多年嘅里昂今季異軍突起，目前領先馬賽、巴黎聖日耳門2分高踞榜首，爭標形勢相當緊湊。雖然佢哋近3場法甲都失分，但要留意呢3場都係硬仗，今仗主場對南特相對最易啅，係時候贏番場振奮士氣，嫌1.46倍主W冇肉食嘅話，就建議玩即場投注等啱賠率先出擊嘞！

樂比推介
里昂（主勝）

蒙彼利埃（下盤）