Combo King：祖記失完分博大翻身

阿King羊年第一次同大家見面，祝各位讀者身體健康、橫財就手！今次重心推介意甲祖雲達斯主場對阿特蘭大，要入球大；祖記上仗大意失兩分，今次肯定會打醒十二分精神，力求盡快入波奠定勝局，好消息係射手泰維斯坐完波監可以復出，勢必盡數對手。阿特蘭大踢法亦進取，可望合演入球騷，首選入球大。

（TVB 301周六凌晨3時45分直播）

祖雲達斯上仗原本可以贏波，但維達爾射失12碼，意外被弱隊切塞納逼和2比2。雖然球隊仲領先次席羅馬七分，但為免被打窒道氣，今仗應會全力爭勝，重振軍心。祖記鋒線人腳鼎盛，射手泰維斯固然犀利，西班牙小將艾華路莫拉達亦好弗，近四仗入三球，阿特蘭大好難招架得住。祖記將於下周中歐聯對多蒙特，預料今場會先下手為強，盡快入多幾球，以免夜長夢多。

阿特蘭大豪邁鬥攻
阿特蘭大實力同祖記有距離，但球隊踢法豪邁，近兩仗同強隊費倫天拿及國際米蘭交鋒都豁出去鬥攻，結果順利開大盤，值得再追。另外，西甲基達菲主場對愛斯賓奴，兩隊過去碰面入波數字偏少，近七次對賽都開細，睇績跟得過。法甲尼斯連續三場同對手互交白卷，主場對防守穩固嘅摩納哥，相信又係一場悶戰，捧細盤。