3件中後場主力打柴
今晚另一場歐聯16強賽事由巴素利主場迎戰波圖，雖然今次係兩軍首次交手，但巴素利主帥保羅蘇沙有「波圖恐懼症」，況且班波中後場仲要唔齊腳，睇怕都幾難搞，呢鋪就算受讓平半都要唔過，博2倍上盤仲好。 （有線64及203周四凌晨3:45直播） 巴素利主帥有波圖恐懼症
主帥保羅蘇沙以前做球員嗰陣，分別踢過賓菲加同士砵亭等隊伍，夾埋12次鬥波圖錄得2勝4和6負，掂親「波」就腳軟，今次再遇波圖仲邊有信心先？況且呢班波喺歇冬後只係踢過2場波，球員狀態不足，你睇佢哋對上2場失3球就知條防線未回魂啦。仲有呀，巴素利中場法比安舒哈今仗坐波監，2位守將艾雲艾雲洛夫、阿達馬查奧爾又傷埋，人腳唔齊影響大，保羅蘇沙唔頭痛就假。 馬天尼斯近13戰入12球
另邊廂嘅波圖就唔同啦，佢哋喺歇冬後10戰8勝，無論信心定狀態明顯比對手優勝。雖然前鋒阿祖安盧比斯休戰，好在仲有近13場入12球嘅積臣馬天尼斯幫手，呢位哥倫比亞國腳活力十足，今晚隨時玩殘下個月滿37歲嘅前阿根廷國腳森美爾，所領導嘅巴素利防線唔出奇。 | 
