SAMVo肥叔 ：薩斯索羅添食費倫

意甲奀星受讓醒神
不經不覺，今季已經打咗一半有多，相信大家都會有各自嘅銀行球隊，長捧總有盈利，好似上半季贏到唔識停嘅西甲班霸皇馬。不過，亦有某些球隊長追卻蝕到入肉，例如差強人意嘅德甲勁旅多蒙特。「大黃蜂」近年於國內與拜仁分庭抗禮，甚至喺前屆殺入歐聯決賽，評級不斷上升，其讓波之辣與名牌球隊無異，可惜上半季接連甩轆，淪落到要護級。凡事有弊亦有利，經過猶如噩夢般嘅上半季，某程度可收退熱之效，並在護級生死存亡關頭下，預計「大黃蜂」會重上正軌，嚟緊不妨吼實佢哋。

另外一些唔太起眼嘅小球隊，值得大家留意，好似意甲「奀星」薩斯索羅，人腳麻麻又冇名氣，但踢落一啲都唔失禮，尤其對住強隊分外醒神，之前喺聯賽與森多利亞、羅馬及祖雲達斯正面交鋒，均保持不敗，上次主場更以3比1擊敗國際米蘭添，今晚意甲再喺自己地頭迎戰另一勁旅費倫天拿，受讓半球咁筍不妨再追。

（TVB 301周日凌晨1時直播）

皇馬吼大好過
至於曾創下連贏22場佳績嘅皇馬，近期開始有回落迹象，先有王牌C朗坐波監，再有占士洛迪古斯受傷，上周慘吞同市死敵馬體會4蛋有辦你睇，嚟緊周中仲有歐聯16強作客史浩克04，今晚西甲主場出戰拉科魯尼亞，難免有所保留，雖然贏波唔難，但要讓到兩球半、三球，實在過晒火位，寧願捧大盤。