卡爾萬 ：車仔雙煞o趙拖肥

迪哥停賽 夏薩特 奧斯卡孭飛
英超今晚繼續加開快車，最矚目梗係車路士同愛華頓喺史丹福橋合演「雙藍大戰」，「藍戰士」箭頭迪亞高哥斯達雖然未坐完波監，但佢哋無論實力同近況都贏晒「拖肥糖」，仲有夏薩特同奧斯卡杜斯山度士兩大後上殺手爭取士哥，一於捧1.85倍「讓球主勝」。

（now621台周四凌晨3:45直播）

首席射手迪亞高哥斯達停賽，唔少球迷都會擔心車仔鋒力會受影響，但其實上次主場攻破曼城大門嘅雷米，同埋經驗老到嘅杜奧巴，射術一樣功架十足，絕對夠條件做「迪哥」替補。再講吖，車仔中場嘅入球效率都唔低，其中奧斯卡杜斯山度士同夏薩特兩員猛將，喺近6場英超就聯手貢獻咗6球，而且中場指揮官法比加斯有望傷愈復出，新援古達度喺史丹福橋處子登場嘅話又實會搏到盡，就算「迪哥」坐波監又使乜驚喎？

無敵史丹福橋 英超11戰10勝
再者車路士個史丹福橋球場唔係人咁品，今季踢11場聯賽贏10場和1場，唯一能夠逃過輸波厄運嘅就只得「二哥」曼城。而且「藍戰士」今季主場平均每場省入兩粒有多，11場又僅失4球，名副其實攻守兼備。既然車仔踢埋今場就要迎接歐聯重開，相信教頭莫連奴都會落柯打去盡，務求贏得好好睇睇，搶分鞏固榜首位置之餘，亦為出征歐聯壯一壯行色。

死火盧卡古倒戈冇作為

愛華頓前鋒盧卡古今場首次重返史丹福橋倒戈車路士，唔使問肯定想踢爭氣波，弊在「小魔獸」近期啞火，近10場英超賽事得1球斬獲。雖然「拖肥糖」近3場冇失過波，但對手西布朗同水晶宮鋒力只屬一般，利物浦今季更係火力大減，所謂防守穩陣含有唔少「水分」，今場「美國隊長」侯活繼續養傷，由身手同經驗都差一截嘅祖爾盧保斯把關，睇怕好難頂得住車仔猛烈攻勢。

盤路解碼
車路士今季英超主場半場從未落後，開出8次「半主」及3次「半和」。

Data King：愛華頓半場6連細
?車路士今季英超主場10次贏波開出6次「2:0」。

?愛華頓連續6場開出「半場細」。

?愛華頓近19次英超造訪史丹福橋未贏過，僅得9和10負。

乜都玩錦囊：拖肥半場投降捧「半主」
愛華頓今季作客表現唔掂，12場錄得3勝3和6負，輸波比率高達5成。最慘係佢哋作客遇着「硬嘢」，例牌踢半場就投降，今季鬥曼聯、熱刺、曼城同修咸頓幾支前列分子，全部由頭輸到落尾，今場造訪「一哥」車路士，1.7倍「半場主勝」值得捧場。