走肖 ：加納闖決賽冇難道

牌面贏晒唔赦東道主
非國盃最後1個決賽席位誕生，東道主赤道畿內亞對加納，睇怕都好難再用所謂奇迹力量晉級。畢竟赤道畿內亞牌面輸幾條街，而且加納教頭格蘭要用行動證明，佢有能力食住加納班大牌球星，1.56倍客W捧得過喎！

（廣東體育周五凌晨3:00直播）

赤道畿內亞喺8強加時後2:1反勝突尼西亞，艾斯杜尼中場巴保亞喺93分鐘射入爭議性12碼扳平，去到加時上半場再入罰球奠定勝局，不過突尼西亞球員好唔順氣，認為球證偏幫東道主亂判12碼，賽後包圍佢講數，搞到球證要搵警方護送離開。

赤道入4強超額完成
鬼咩！今次赤道畿內亞啲所謂外流球星，主要効力西班牙低組別球隊，就連教頭艾斯迪賓加都承認，晉級好似創造奇迹咁，入到4強真係偷笑。情感上，港超聯球隊標準流浪嘅34歲中場艾雲連續4場踢足全場，應該撐吓赤道畿內亞至啱，不過以加納嘅陣容，佢哋質素同實力係高半班波！

加納教頭食住班球星
加納喺8強以3:0輕取畿內亞，効力艾阿恩嘅隊長基恩已連續3場打正選，證明佢已經病愈，況且教頭格蘭賴理外界批評，安排水晶宮前鋒卡華斯艾比亞取代羅連安特前鋒佐敦阿休打正選，結果卡華斯艾比亞上場用入球報答佢，食得住班球星，使乜驚東道主？

非國盃4強