Combo King：阿積士軍心大振

法蘭迪保亞效忠執教
荷甲近年都係阿積士天下，今季終於有球隊挑戰到佢嘅王者地位，燕豪芬依家打多阿積士一場但領先對手十二分，奪冠機會高唱入雲。阿積士爭標形勢惡劣，周五凌晨喺主場對住阿爾克馬爾，肯定會大舉進攻，阿King今場熱捧大盤！

（now 670周五凌晨3時45分直播）

阿積士近兩場聯賽失分，唔多唔少同主帥法蘭迪保亞嘅過檔傳聞有關，好耐之前都傳過法蘭迪保亞會去英超教熱刺或者利物浦，不過都係煲水新聞，但近排紐卡素領隊一位懸空，令佢會過檔「紐記」嘅傳聞傳得好行，球隊軍心自然受到影響。不過法蘭迪保亞日前向球隊上下大派定心丸，話無意過檔教紐卡素，下季都會繼續留隊執教，更擺愛女上枱，話留喺阿積士就可以睇到佢個女打手球。阿積士成班球員聽到可以專心幫球隊爭標喇！

AZ防中缺陣頂唔住
阿積士今場為搶分肯定會採取主動進攻，阿爾克馬爾作客好難頂得住，加上AZ有防中柯列斯因傷缺陣，削弱防守能力，球隊近六次作客阿積士全開大盤，今場一於再追！

阿King再講埋另一場荷甲賽事，荷華高斯主場對格羅寧根，荷華高斯近況頹爆，連埋盃賽同熱身賽近六場全敗，格羅寧根受讓竟然仲有1.63倍，梗係要捧喇！最後智甲賽事，紐柏萊斯主場迎戰卡拉雷聯，卡拉雷聯近況大勇連贏三場，平手盤要得過！